شعار كل أب و أم ... بلاش كلهم عشان منظلمش حد!, نقول 90% منهم مثلا؟
صدقني مش فارقة ان كنت حمادة او كنتي سوسن ..هو نفس الخوف , بيخافوا علينا أكتر ما احنا بنخاف على نفسنا.
متتكلمش في السياسة يا حمادة في الكلية..لحسن يا حبيبي في مخبرين, متتكلمش في السياسة في التليفون يا حمادة لحسن بيسمعوا كل حاجة.. طب ايه يا حمادة ؟ هتتكلم فين يا ضينايا...في الحمَّام؟
طب كان زمان و مبارك كابس على أنفاس اهلنا, و كنا بنقول مااااااشي ,ليهم حق يخافوا.
طب دلوقتي أهوه غار! خايفين ليه بقى؟ حد يفهمني ونبي!
لو حمادة رايح النادي ولا يقعد في كافيه ,يبقى فلة و ابني حبيبي اللى مريح أمه.
حمادة نازل مظاهرات يبقي منه لله اللي واجع قلبي و مدوخني عليه.
ما تسيبوا حمادة يبقالوا شخصية , سيبوه يقول رأيه , يعني هيبقى حُسني و انتوا و الزمن عليه؟
ليه تحبسوا صوتنا, و تخوفونا و تخافوا من غير سبب.
ما ينزل مظاهرة ويهتف عشان بلده و يبقاله دور و يحس بحريته اللي كان مبارك سارقها منه.
على رأي مدام جوجو "اللي حابسك خلاص مات"..
انا محستش اني حرة غير لما نزلت مظاهرة و هتفت مع الناس , و محستش بقيمة نزولي غير لما ابتدت فعلاً محاكمة الفاسدين.
عارفة انكوا خايفين عليا, بس انتوا كده هتقتلوا حريتي, انا جواية طاقة تكفي مظاهرات الدنيا كلها.
مش هتبسط لو خرجت مع اصاحبي , ولا اما تِدوني فلوس و اشتري اي حاجة.
انا عايزة ابقى حرة , حرة في الصح, و ايه أصح من الي احنا فيه دلوقتي ؟
لازم تتعلمي تقولي لأ وتفرضي رأيك, إنتي مش صغيرة
ReplyDeleteأنا ماما كانت هتموت عليا يوم 25 كان فاضل تبوس إيدي عشان مانزلش... قولتلها بكل بساطة, أنا ملك ربنا مش ملكك,وأنا متوكل على ربنا مش عليكي, وأنا مبخافش غير من ربنا, يبقى إنتي تخافي عليا ليه؟
و أنا هعمل إللي يبسطني, حتى لو اتحبست هكون مبسوط, لو اتقتلت هموت مبسوط